Kennismaoken   

Ik bin in april 1959 geboren in Nörg, in de kop van Drenthe. Oons gezin bestun oet pap en mam en dree wichter. Wij woonden in bij opa en oma en hadden een klompenmaokerij, een winkel in tabak en een scheersalon/kapsalon.
As klein kind much ik altied al graog lezen en dat is nooit veraanderd. Gek op verhaolen!
Toen ik in Assen naor de HAVO gung, wör mij deur mien leraor Nederlaands zèegd dat ik toch veural deur mus gaon met schrieven. Hij gaf mij prachtige ciefers veur al mien schriefopdraachten. Dat dee ik tot ik van school gung. Daorna heb ik jaoren niet schreven. Ik har 't veul te drok met waark, kinder en körfbal.

In 2013 bin ik weer begund met schrieven. Eerst nog allén in 't Nederlaands, maor naodat ik metdaon har an Dwingelart, een open podium in Dwingeloo, aal vaoker ok in 't Drèents. Ik dee de Drèentse spellingscursus en laoter ok de Drenthe cursus over oonze taol en cultuur. Bovendien wör ik lid van de schriefclub Schriefwaark van Het Huus van de Taol, waor wij aal weer wat neis leert en de meest moeilijke, vrömde, mooie opdraachten metkriegt naor hoes.

Ik kreeg aal vaoker te heuren dat ik ies wat gedichten in een bookie mus publiceren. Ik har intied al een mooie verzaomeling en zo kwam in november 2016 mien eerste bookie oet, 'Leven is leefde'.

In meert 2017 was der een Lös Huus bij Het Huus van de Taol. Daor dee ik met an Loketpoëzie. Ik zat aachter een loket en mèensen konden bij mij kommen en één op één naor een gedicht van mij luustern. Spannend, maor mooi um te doon!

Op die dag kreeg ik een oetneudiging om in september 2017 veur te draogen op het Brummelfestival in Pesse. Daor stun ik in de pauze tussen twee optredens van bluesbands tussen twee grote tenten op een boerenkar. Een mooie ervaoring!

In meert 2018 kwam  mien tweede bookie oet en much ik veurdraogen bij Taal an Taofel in Noord-Sleen, in juli tiedens de Drèentse Aovend in Peize en in september tiedens de bookpresentaotie van een vriendin.
In 2018 begon ik ok met het schrieven van verhaolen in de Noordenveld Plus en columns in De Krant. Der wör veur 't eerst een gedicht plaotst in de Zinnig en het verhaol wat ik inleverde veur de schriefwedstried 'Winter' kwam in het bookie 'Kold', oetgeven deur Het Huus van de Taol.

In september 2018 kwam 'Frederik en Annechien' oet, een bookie ter ere van de veerde verjaordag mien kleinzeun. Ik schreef de tekst en de aandere oma maokte der tekeningen bij. Mooie saomenwaarking! De opbrengst van de verkoop van dit bookie gung/geit naor KIKA.

In jannewaori 2019 is in de gang van De Omloop mien gedicht 'd'Aole eeik' ophangen. Mien zeun hef dat hartstikke mooi oetsneden oet linoleum. Supertrots bin 'k daor op!

In april 2019 wör mien tweede kleinzeun veer jaor. Ok hij kreeg een bookie 'Simon Slak is jarig'. De aandere opa maokte met veul plezeer de plaoties daorbij. Ok hiervan gung/geit de opbrengst naor KIKA.

December 2019 > dit jaor much ik het kaarstverhaol schrieven veur De Krant! Trots op het risseltaot!

In 2020 open ik dizze spiksplinterneie webstee, waor ik hartstikke wies met bin! 
Ok mag ik veer maol in 't jaor een stukkie regeln in De Boerhoorn, het blad van de historische vereniging Norg.